「有港人就有故事,有大媽就有歡樂」
呢句野永遠都係豆腐嘅座右銘,最近一個月飛左兩班曼谷大媽機,歡樂指數爆哂燈
1.派餐篇
大家都知道廣州話嘅奧妙,有好多字發音唔正就會變粗口諧音,當遇上正宗廣州乘客就真係好似上左一堂 😅去餐飲嘅時候,眼見成個後艙都係大媽團,有腦嘅同事都會擺壺茶孝敬佢地老人家啦
豆腐「太太,請問想飲啲乜呀」
大媽「有咩野飲料呀」
豆腐「哦有果汁汽水葡萄酒嗰啲囉」
大媽「要熱嘅」
豆腐「熱茶岩唔岩飲呀」
點知插住耳機嘅大媽突然氣聚丹田大聲講
「我要閪水,熱閪水呀」
咁岩呀姐喺道,我地兩個當堂笑到肚痛兼碌地,然後呀姐好快就喺廚房拎左杯「熱開水」比大媽
姐係咁,發音唔正係冇問題,不過可唔可以唔好插住耳機再擘大喉嚨講野呀?
「嚇死人咩,個心離一離呀」😱😱😱
2.如廁篇
強國大媽打開飛機門乘涼嘅新聞都常有發生,大吉利是就冇發生喺豆腐嘅班機上面,話說空中巴士A330機尾係得廚房就冇廁所,派完餐之後無啦啦有幾個大媽企喺廚房外面排隊,之後見到有個大媽意圖拎佢隻手去拉起飛機門個手抦,豆腐即刻九衝(9秒9呀)埋去
豆腐「呀姨你幹嘛」
大媽「禾姚燒餅」
豆腐「你說什麼？你幹嘛開飛機門」
大媽「燒餅呀(小便)」
豆腐「你要尿就去衛生間,幹嘛開飛機門,衛生間在前面,你開飛機門大家會死掉的」
呢個時候,大媽頭也不回,一個鐵砂掌推開豆腐然後飛奔去廁所,其餘幾個大媽都即刻狗衝去前面廁所 🚽
正所謂為左屙尿,你可以去到幾盡?! 💦
3.降落篇
降落曼谷之後十次有五次都要停一陣先去到閘口嘅,然後加上大叔大媽最中意彈起身架啦,十次有十一次都要好似扑傻瓜咁叫佢地坐返低,今次都唔例外一見到個大叔企起身,唔係坐門位嘅豆腐就起身行去叫大叔坐返埋位
豆腐「先生,飛機還未到閘口,你要坐下」
大叔講完一句「沒事兒」就坐左喺地下喎
豆腐「先生,你為什麼坐在地上呀」
大叔「你說要坐下,我就坐下來喔」
聽完當堂比佢激到暈低,不過豆腐下次會學識比清晰啲嘅指示 😂😂😂
題外話,尋日喺機上有同事話豆腐近來好少更新,的確係嘅,事關豆腐最近連續好多日都要飛短機,所以真係忙到無乜心情同空閒時間更新 😭
Search